တနင်္သာရီတိုင်းဒေသကြီး၊ ထားဝယ်ခရိုင်၊ လက်ထောက်ညွှန်ကြားရေးမှူးဦးလွင်ကိုဦး၊ ထားဝယ်မြို့နယ်၊ သစ်တောဦးစီးဌာနမှ၊ ဦးစီးအရာရှိ ဦးရဲဝင်းအောင်နှင့် ရေဖြူမြို့နယ်၊ သစ်တောဦးစီးဌာနမှ ဦးစီးအရာရှိ ဦးနိုင်လင်းအောင်တို့မှ(၂၄-၇-၂၀၂၄)ရက်နေ့၊ နံနက် (၁၀:၀၀)နာရီအချိန်၌ ထားဝယ်မြို့၊အမှတ်(၁) အခြေခံပညာအထက်တန်းကျောင်း၊ စုဝေးခန်းမတွင် " မိုးရာသီသစ်ပင်စိုက်ပျိုး၊ပြုစု၊ထိန်းသိမ်းရေး"ခေါင်းစဥ်ဖြင့် သစ်ပင်စိုက်ပျိုးခြင်း၏အကျိုးကျေးဇူးများ၊ သစ်ပင်စိုက်ပျိုး၊ ပြုစု၊ ထိန်းသိမ်းခြင်းနည်းစနစ်များနှင့် သစ်တောများထိန်းသိမ်းကာကွယ်ခြင်းစသည့်အကြောင်းအရာများကိုအထက်တန်းအဆင့်ကျောင်းသား(၁၂၆)ဦး၊ ကျောင်းသူ(၁၉၈)ဦး၊ ဆရာမ(၆)ဦး၊ စုစုပေါင်း (၃၃၀)ဦးတို့အား အသိပညာပေး ဟောပြောခြင်း၊ သိရှိလိုသည်များ ပြန်လည်ဖြေကြားခြင်းဆောင်ရွက်ခဲ့ပြီး တက်ရောက်သူများသို့ စာရေးဘောပင်များ ပေးအပ်ခဲ့ပါကြောင်းနှင့် ဟောပြောပွဲပြီးစီးပြီး (၁၁:၃၀)နာရီအချိန်၌ ကျောင်းဝန်းအတွင်း ခရေ၊ ရေတမာ၊ ဗန်ဒါ (၅၀)ပင်တို့အားသစ်တောဝန်ထမ်းများမှကျောင်းသား/သူ၊ ဆရာမများကို သစ်ပင်စိုက်ပျိုးမှုနည်းစနစ်များရှင်းလင်းပြောကြား၍ ပူးပေါင်းစိုက်ပျိုးဆောင်ရွက်ခဲ့ပါကြောင်းသိရှိရပါသည်။

(၂၅-၇-၂၀၂၄)ရက်နေ့ နံနက်(၀၈:၀၀)နာရီအချိန်တွင် မြိတ်ခရိုင်၊ကျွန်းစုမြို့နယ်၊ ကတ္တလူကျေးရွာအနီးတွင် ၂၀၂၄ခုနှစ်၊ ဇူလိုင်လ(၂၆)ရက်နေ့တွင် ကျရောက်သော အပြည်ပြည်ဆိုင်ရာ ဒီရေတောဂေဟစနစ်ထိန်းသိမ်းရေးနေ့ အထိမ်းအမှတ် ဒီရေတော သစ်ပင်စိုက်ပျိုးပွဲတော်ကိုကျင်းပခဲ့ပါသည်။ ဒီရေတော သစ်ပင်စိုက်ပျိုးတော်သို့ တနင်္သာရီတိုင်းဒေသကြီး အစိုးရအဖွဲ့ဝန်ကြီးချုပ်ဦးမြတ်ကိုနှင့် ကမ်းရိုးတန်းဒေသ တိုင်းစစ်ဌာနချုပ် တိုင်းမှူး၊ တနင်္သာရီရေတပ်စခန်းဌာနချုပ် ဌာနချုပ်မှူး၊ မြိတ်လေတပ်စခန်းဌာနချုပ် ဌာနချုပ်မှူး၊ အစိုးရအဖွဲ့ဝန်ကြီးများ၊တိုင်းဒေသကြီးအဆင့်၊ ခရိုင်အဆင့်၊ မြို့နယ်အဆင့် ဌာန ဆိုင်ရာများ၊ အမျိုးသမီးရေးရာအဖွဲ့၊ မိခင်နှင့်ကလေးစောက်ရှောက်ရေးအဖွဲ့၊ ကုမ္ပဏီဝန်ထမ်း များနှင့် ဒေသခံပြည်သူများ စုစုပေါင်း(၃၂၀)ဦးတက်ရောက်ပြီး၊ တနင်္သာရီတိုင်း ဒေသကြီး အစိုးရအဖွဲ့ဝန်ကြီးချုပ် ဦးမြတ်ကိုမှ လမုပင်နှင့် အုန်းပင်ကိုစိုက်ပျိုးပေးပြီး၊ တက်ရောက် လာသူများမှ ဒီရေတောသစ်ပင် ဗြူးအုပ်ဆောင်း (၁၀၀၀)ပင်၊ ဗြူးခြေတောက် (၂၀၀)ပင် စုစုပေါင်း(၁၂၀၀)ပင်နှင့် အုန်းပင်(၅၀)ပင်အား စိုက်ပျိုးခဲ့ပါသည်။ အခမ်းအနားအား (၀၈:၄၅)နာရီတွင် အောင်မြင်စွာ စိုက်ပျိုးပြီးစီးဆောင်ရွက်နိုင်ပါကြောင်းသိရှိရပါသည်။

သစ်တောဦးစီးဌာန၊ ညွှန်ကြားရေးမှူးချုပ် ဒေါက်တာသောင်းနိုင်ဦးသည် သစ်တောဦးစီးဌာနနှင့် တရုတ်သိပ္ပံအကယ်ဒမီ( CAS)ကူမင်းရုံးခွဲမှ Director General ဖြစ်သူ Prof. Jie Zhou ဦးဆောင်သော ကိုယ်စားလှယ်အဖွဲ့အား ( ၂၅-၇-၂၀၂၄) ရက်နေ့နံနက်ပိုင်းတွင် သစ်တောဦးစီးရုံးချုပ်၊ အင်ကြင်းခန်းမတွင် လက်ခံတွေ့ဆုံပြီး သစ်တောဦးစီးဌာနနှင့် တရုတ်သိပ္ပံအကယ်ဒမီ(CAS) စစ်ဆောင်ပါးနားအပူပိုင်းရုက္ခဗေဒဥယျာဉ်(XTBG)တို့အကြား နားလည်မှုစာချွန်လွှာ လက်မှတ်ရေးထိုးပူးပေါင်းဆောင်ရွက်လျက်ရှိသောလုပ်ငန်းများနှင့်ပတ်သက်၍ ဆောင်ရွက်နေမှုအခြေအနေနှင့် ပိုမိုပူးပေါင်းဆောင်ရွက်သွားနိုင်ရေး ရင်းနှီးပွင့်လင်းစွာ ဆွေးနွေးခဲ့ကြပါသည်။သစ်တောဦးစီးဌာနနှင့် တရုတ်သိပ္ပံအကယ်ဒမီ (CAS) စစ်ဆောင်ပါးနားအပူပိုင်း ရုက္ခဗေဒဥယျာဉ်( XTBG)တို့သည် “မြန်မာနိုင်ငံတွင်ဇီဝမျိုးစုံမျိုးကွဲထိန်းသိမ်းခြင်းနှင့် သုတေသနလုပ်ငန်းများ ပူးပေါင်းဆောင်ရွက်ခြင်းစီမံကိန်း”ကို ၂၀၂၄ ခုနှစ် ဧပြီလမှ ၂၀၂၉ ခုနှစ် ဧပြီလအထိ (၅)နှစ်သက်တမ်းရှိသော စာချွန်လွှာလက်မှတ်ရေးထိုးဆောင်ရွက်လျက်ရှိကြောင်းနှင့် တွေ့ဆုံပွဲသို့ သစ်တောဦးစီးဌာနမှ ညွှန်ကြားရေးမှူးချုပ်ဒေါက်တာသောင်းနိုင်ဦး၊ ဒုတိယညွှန်ကြားရေးမှူးချုပ်များ၊ညွှန်ကြားရေးမှူးများတက်ရောက်ခဲ့ကြကြောင်းသိရှိရပါသည်။