သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီး ဌာနသည် ကိုရီးယားနိုင်ငံ၊ အာရှဒေသသစ်တောကဏ္ဍဆိုင်ရာ ပူးပေါင်းဆောင်ရွက်ရေးအဖွဲ့ (Asian Forest Cooperation Organization – AFoCO)၏ ရန်ပုံငွေအထောက်အပံ့ဖြင့် “သစ်တောများအား မှီခိုနေထိုင်သူများ၏ လူမှုဘဝဖွံ့ဖြိုးတိုးတက်စေရန်အတွက် သစ်တောထိန်းသိမ်းခြင်းနှင့် ဒေသခံပြည်သူအခြေပြု စီးပွားရေးလုပ်ငန်းများဖွံ့ဖြိုးမှုဆိုင်ရာ စံပြသစ်တောများ တည်ထောင်ခြင်းစီမံကိန်း (FD-AFoCO Model Forest Project)” ကို ၂၀၂၀ ပြည့်နှစ်၊ ဒီဇင်ဘာလမှစတင်၍ ၂၀၂၅ ခုနှစ်၊ မတ်လအထိ အကောင်အထည်ဖော် ဆောင်ရွက်လျက်ရှိရာ ထာဝစဉ်တည်တံ့စေသော သစ်တောစီမံအုပ်ချုပ်မှုကို အထောက်အကူပြုစေရေး၊ ဂေဟစနစ်တည်ငြိမ်စေရေး၊ ဇီဝမျိုးစုံမျိုးကွဲထိန်းသိမ်းရေး၊ သဘာဝဘေးအန္တရာယ် လျှော့ချရေး၊ ရေမြထိန်းသိမ်းရေး၊ ဒေသခံပြည်သူများ၏ စွမ်းဆောင်ရည်တိုးတက်မြင့်မားစေရေးနှင့်အတူ ဝင်ငွေအခွင့်အလမ်းများ တိုးပွားစေရေးအတွက် ဒေသခံပြည်သူအစုအဖွဲ့ပိုင်သစ်တောလုပ်ငန်း ဆောင်ရွက်နေသူ ဒေသခံ (၂၀)ဦးဖြင့် ၂၀၂၄ ခုနှစ်၊ ဇူလိုင်လ ၂၂ ရက်နေ့မှ ၂၆ ရက်နေ့အထိ ၅ ရက်ကြာ ဖွင့်လှစ်ပို့ချမည့် “သီးနှံသစ်တောရောနှောစိုက်ပျိုးခြင်းသင်တန်း” သင်တန်းဖွင့်ပွဲ အခမ်းအနားကို ဗဟိုသစ်တောလုပ်ငန်းဖွံ့ဖြိုးမှု လေ့ကျင့်ပညာပေးရေးဌာန (CFDTC)၊ မှော်ဘီ မြို့တွင် ၂၀၂၄ ခုနှစ်၊ ဇူလိုင်လ ၂၂ ရက်နေ့၊ နံနက် ၉:၀၀ နာရီအချိန်တွင် ကျင်းပပြုလုပ်ခဲ့ပါသည်။ သင်တန်းဖွင့်ပွဲအခမ်းအနားကို သစ်တောဦးစီးဌာန၊ လေ့ကျင့်ရေးနှင့် သုတေသနဖွံ့ဖြိုးရေးဌာန၊ ညွှန်ကြားရေးမှူး၊ လက်ထောက်ညွှန်ကြားရေးမှူး၊ ဗဟိုသစ်တောလုပ်ငန်းဖွံ့ဖြိုးမှု လေ့ကျင့်ပညာပေးရေးဌာန၊ ကျောင်းအုပ်ကြီး၊ လက်ထောက်ညွှန်ကြားရေးမှူး၊ ဦးစီးအရာရှိများ၊ စီမံကိန်းဝန်ထမ်းများ၊ သင်တန်းဆရာများနှင့် သင်တန်းသားများအပါအဝင်စုစုပေါင်း(၃၄)ဦး ပါဝင်တက်ရောက်လျက် ကျင်းပဆောင်ရွက်ခဲ့ပါသည်။

ရန်ကုန်တိုင်းဒေသကြီး၏ ၂၀၂၄ ခုနှစ် ၊ ဆဌမအကြိမ် မိုးရာသီသစ်ပင်စိုက်ပျိုးပွဲ ကို (၂၂-၇-၂၀၂၄)ရက်နေ့၊ (၀၇:၃၀)နာရီအချိန်တွင် အရှေ့ဒဂုံမြို့နယ်၊ ဒဂုံတက္ကသိုလ်ဝင်းအတွင်း ကျင်းပပြုလုပ်ရာ ရန်ကုန်တိုင်းဒေသကြီး ဝန်ကြီးချုပ်နှင့်ဇနီး၊ တရားသူကြီးချုပ်၊ အစိုးရအဖွဲ့ ဝင်ဝန်ကြီးများနှင့် ဇနီးများ ၊ ဥပဒေချုပ်၊ ရန်ကုန်တိုင်း စစ်ဌာနချုပ် ဒုတိယတိုင်းမှူးနှင့်ဇနီး၊ တိုင်း/ခရိုင်/မြို့နယ်ဌာနဆိုင်ရာများ၊ ကျောင်းသား/ကျောင်းသူများ၊ အသင်းအဖွဲ့များ၊ ဒေသခံပြည်သူများ အင်အား (၂၂၅၀) ဦး တက်ရောက်ခဲ့ပြီး ပျဉ်းကတိုး၊ ပိတောက်၊ ပျဉ်းမ၊ ခရေ၊ ငုဝါ၊ စိန်ပန်းကြီး၊ တရုတ်တည်၊ မဟော်ဂနီ၊ မန်ဂျန်ရှား၊ မအူ၊မယ်ဇယ် စုစုပေါင်းသစ်မျိုး(၁၁)မျိုး၊ အပင်(၅၀၅၈)ပင် တပျော်တပါး စိုက်ပျိုးခဲ့ကြပါကြောင်း သိရှိရပါသည်။

ရန်ကုန်တိုင်းဒေသကြီး သစ်တောဦးစီးဌာနအနေဖြင့် သစ်တောသစ်ပင်စိုက်ပျိုးခြင်း၊ ပြုစုထိန်းသိမ်းခြင်းတို့ကို ပြည်သူလူထုအတွင်း နိုးကြားသော အသိစိတ်ဓာတ်ရှင်သန်စေရေး အတွက် အသိပညာပေး ဟောပြောခြင်းများကို ဆောင်ရွက်လျက်ရှိရာ(၁၈-၇-၂၀၂၄) ရက်နေ့၊ (၁၃:၀၀)နာရီအချိန်တွင် လှည်းကူးမြို့နယ်၊ သမဝါယမကောလိပ်(ဖောင်ကြီး)၌ ၂၀၂၄ခုနှစ်၊ မိုးရာသီသစ်ပင်စိုက်ပျိုးခြင်းနှင့် ပြုစုထိန်းသိမ်းခြင်းဆိုင်ရာ အသိပညာပေး ဟော ပြောပွဲ ကျင်းပပြုလုပ်ရာ ဟောပြောပွဲသို့ လှည်းကူးမြို့နယ်၊ မြို့နယ်စီမံအုပ်ချုပ်ရေး အဖွဲ့မှ အဖွဲ့ဝင်များ၊ သမဝါယမကောလိပ် ကျောင်းအုပ်ကြီး ဦးရဲမြင့်သန်း၊ ဒုတိယကျောင်းအုပ်ကြီး နှင့် ဆရာ/ဆရာမများ၊ ကျောင်းသား/ကျောင်းသူများ(၃၀၀)ဦး တက်ရောက်ခဲ့ကြပြီး လှည်းကူးမြို့နယ် သစ်တောဦးစီးဌာနမှ ဦးစီးအရာရှိ ဦးပြည့်ဖြိုးကျော်က ကမ္ဘာ့သစ်တော များနှင့် မြန်မာ့သစ်တောများ၏ တည်ရှိမှုများ၊ သစ်တောသစ်ပင်များ၏ အကျိုးကျေးဇူးများ၊ သစ်တောသစ်ပင်များမှ ပေးစွမ်းနိုင်သည့် ထုတ်ကုန်နှင့်ဝန်ဆောင်မှုများ၊ ရာသီဥတု ပြောင်းလဲမှု လျှော့ချရေးတွင် သစ်တောများ၏အရေးပါမှုနှင့် မိုးရာသီကာလ သစ်ပင်စိုက်ပျိုး ပြုစုခြင်း နည်းစနစ်များကို တက်ရောက်လာသူများ သိရှိနားလည်စေရန် အကျယ်တဝင့် အသိပညာပေးဟောပြောခဲ့ပြီး သစ်တောသစ်ပင် စိုက်ပျိုးခြင်း၏ အကျိုးကျေးဇူးများ အသိပညာပေး လက်ကမ်းစာစောင်(၃၀၀)ကို တက်ရောက်လာသူများအား သစ်တောဦးစီး ဌာန၊ ဝန်ထမ်းများမှ ဖြန့်ဝေပေးခဲ့ပါကြောင်း သိရှိရပါသည်။